www.meldal.no

Målet var å få transportert myrjord fra eit område ved Druglia, Linkjedalen, til flata nedafor der garden Druglimoen ligg. Sjå kartskisse.

Jorda på flata var dårleg til dyrkingsjord, berre rustfarga grus under torva. Men oppe i lia i Linkjedalen, var det djup myr.

For å få myr til å blanda i sanden for å få omdanna sandjorda til god jordbruksjord, fann dei ut at det måtte blandast inn myr frå Linkjedalen.

Einar fortel at det var bestefaren hans, Jon Einarsen frå Fredikslia i Rindal f. 1835, som starta arbeidet her. Han vart gift med jordtausa Olaug i Druglia. Som vanleg i denne tida tok dei namn etter garden der dei budde. Slik vart det også her.

Saman med Johan Druglitrø, Jehan Trøom, som dei kalla han til dagleg, tok dei til arbeidet med å flytta myrjord nedpå flata.

I området var det stor skog i overgang til bratt terreng. Det gjorde det mogleg å laga i stand denne "transportbana" av tømmer for å letta transporten. dei bygde store plattinger som dei lesste myra på. på denne "bana" på toppen av bakken la dei plattingar. Bratt som det var, gjekk dei lett nedover lia, og dei kunne lesse store lass, 10-15 hestelass for kvar gong. Det var ikkje hjulgang på plattingane - dei glei på bana, kanskje med ein eller annan form for smurning. Det var ordna ei innretning slik at dei tømte lasset sjøl - på ein slags "sprett-hopp"

Plattingane måtte køyrast opp att opp bakken i terrenget. Dei krøkte på ein kjetting, og hadde to hestar til å dra opp plattingane for nye lass.

Dei dyrka litt jord for kvar sommar. Med myrinnblanding i sandjorda vart det god dyrkingsjord.

Og det var mykje arbeid som vart gjort. Einar fortel at han hugsar at far fortalte at dei dreiv på i ca. 15 år. Dei tok ut myra over ca. 1,5 mål i tre meter djupne. Og det var ikkje så lite myr som vart flytta og lite arbeid som vart gjort!

Einar hugsar at det nå er ca. 70 år sidan han fekk dette fortalt første gongen av onkelen sin, Einar Drugli, fødd 1868. Han hugsar også denne plattingen som dei lesste myrjorda på, og at han som sekåring såg dei frakta jord ned på flata på denne måten. 

Fortalt til årbok 45 av Einar Drugli i 2005. Utgitt av Meldal Historielag.

Red: Hilde Stina Elshaug