www.meldal.no

Dei 14 oppmøtte fekk mellom anna høyre ei svært innhaldsrik årsmelding, som starta slik:

«Det er stor aktivitet hele året i Å grendelag som skaper trivsel, tilhørighet og engasjement i Oppbygda.»

Leiaren siste året, Anne Merete Gunnesmo Å, kunne så ramse opp fleire sider med alt som har sprunge ut frå grendelaget siste året. Naturlegvis er det Å-stuggu som er hjartet, motoren og det mest arbeidskrevande.  Skuleungdommar blir sysselsette i helger og feriar, mens damer i sin beste alder, også kalla Snelloin, held kafeen levande til kvardags. Å-stuggu og det nyoppussa uthuset blir også leigde ut til private arrangement.

Grendelaget har elles hatt ansvar for Julegata 2018, arrangert bluespub med Madcap Flyers og naturlegvis vore delaktig i grautdagen. Kvisskveldar og strikkekafe, kaker til 17.mai-feiring og kaffeservering 1.mai i samband med Trollheimen rundt kan og nevnast. Det er planar om både bacalao-, opera- og bluespub i kommande året.

Etter at kommunen reklamerte for pengar i fond som skulle fordelast før Orkland, vart ulike idear drøfta. Kva skulle grenda prioritere? Grendelaget gjekk for støtte til å opne oppatt gangstien ved elva, og fekk, som dei andre grendelaga i bygda, 200 000 kroner til stedsutvikling. No er mange gode krefter klare til innsats og det ligg til rette for å starte opp med arbeidet, men meir pengar trengs, så det blir søkt fleire plassar. 

I tillegg til vanlege årsmøtesaker, kom det opp eit spørsmål om ikkje leiaren i laget skulle hatt ein liten stillingsprosent, eller i det minste ei økonomisk påskjønning. Møtedeltakarane hadde stor forståing for dette, for alle har sett den store arbeidsbyrden leiaren har. Alt dette rundt Å-stuggu er jo nærmast ei bedrift, og det er nok mange styreleiarar med langt mindre arbeid som får både lønn og andre frynsegode. Dette spørsmålet vart sendt vidare til det nye styret.

Elles vart det bestemt at kontingenten blir auka frå 200 til 300 kroner for kvar husstand. Ein skulle tru det er ein billig pris for eit levande lokalsamfunn. 

Siste året har Anne Merete Gunnesmo Å vore leiar i grendelaget. Elles har Oddrun Gisnås, Jan Ove Skjølset, Marit Foss Sundseth, Ingmar Jordet og Astrid Fossmo vore i styret, med Mari Stene, Atle Steigedal og Synnøve Aa som vararepresentantar.

I det nyvalte styret blir Anders Løfaldli leiar. Med seg har han Ingmar Jordet, Oddrun Gisnås, Marit Foss Sundseth, Anne Merete Gunnesmo Å, Mari Rikstad, Hans Georg Hess og Ranveig Karlsen (dei tre siste vararepresentantar.)

Jan Ove Skjølset fekk blomar for lang tjeneste i grendelaget.

Kari og Erik Stene har lagt ned svært mykje arbeid for lokalsamfunnet i Oppbygda. I kveld møtte Kari for valkomiteen.

God stemning og gode vafler.

Tekst og foto: Marit Foss Sundseth